Uretse ukumwenyura kwiza kw’umwigeme Esthere Munezero kukwakira ugishika mu biro iwe aho asanzwe akorera ivyo gushariza mu mazu, ubwenge n’ubwitonzi uyu mwigeme afise buratuma ugira icizere ko uburundi bugifise urwaruka ruri na kazoza hamwe rwoshigikirwa.
Ntimuze kurambirwa ntuze weya, ingo tubayagire namwe muragira ico mubivuzeko si agaseseshwarumuri.
Mbega uyu Esthere ni nde?
N’uko rero, reka dutembere gato mu bikorwa vy’ishirahamwe Burundi cozy corner ryatangujwe n’umwigeme w’umurundikazi akiri muto cane yatemberewe n’ikinyamakuru Nagaciro.
Ugishika mu biro vya Burundi Cozy Corner, uretse ko wakirwa na kimwe abakiri bato bita igi “sourire” c’umwigeme Estere Munezero, uca usubira kandi ukabona icapa kinini c’agashimwe aheruka kuronka, mw’ihiganwa yahoramwo rishimikiye kuvyo gukingira isi ihindagurika ry’ibihe mubikorera utwabo.
Akiriko arakira Nagaciro mu biro iwe, yaratubajije ati mbazimane iki? kamwe k’abarundi natwe tuti “oya ntimwigore.” Nuko tuca turakoroka n’ikibazo ca mbere tuti: ” Mbega muri bande?
Mu rupfasoni rwinshi aratubwira ati: “Jewe nitwa Munezero Esthere nize ivya Comptabilité et fiscalité”
Akitubwira ivyo yize twaciye twumva dushaka kumenya ko hari ico bipfana n’ivyo akora nawe araduhakanira, atubwira ati abikora kubera abikunda, ariko ntiyibagiye kwongerako n’agatwengo kenshi akantu ngo “Ndabikunda kandi bimpa agafaranga kubera sindi ONG simfasha ahubwo ni kwa kuntu nyene uba washatse gu crea ikintu kiguha amafranga kubera mbere namye nipfuza no kuba umu entrepreneur kuva kera”
Nagaciro: “Mbega hari abanyamuryango bawe boba barabikoze twovuga ko ari bo ufatirako akarorero?”
Esthere: ” Mu muryango wanje, oya ntanumwe yabikora ariko ndafise belle soeur wanje abikunda, ego arakunda gukora ivy’ugushariza”
Ikiyago cabandanije kiryoha hamwe na Esthere mbere dutangura gutembera aho akorera duhindura duhindukiza bimwe mubisharizo biteye igomwe akora, ee mama twiraba no mucirore ciza kinini yaguze kiri mu kibanza akoreramwo, agatwengo kaba kose, nakare uwuyaga n’uwumumwenyurira ntagira umwavyi.
Mbega akazi ko gushariza hari aho koba kamaze kumugeza?
N’uko, turavye hejuru, twahabonye icapa cerekana ko aheruka gutsindira agashimwe, duca dusanga tutogenda tutamubajije ivy’ako gashimwe aheruka kuronka mw’ihiganwa Shika award kamanitse hejuru mu biro iwe, kerekana neza ko yatsindiye inoti y’imiliyoni zitatu zitavuyemwo n’imeya.
Mu mutekano ntangere, yaratwishuye, uretse ko abikora yitekaniye mu kwishura, eka mbere wokwibaza ko ari n’umwe mu bihebeye Imana (umubikira), yaratubwiye ati:
“Ego nivyo twararonse agashimwe k’abakora utwabo bisunze gukingira ibidukikije. muvyo twisunga harimwo ugu recycla, uguha ubuzima bushasha ama dechet(iyarara) nk’amagunira, amacupa canke ibibuni. Nk’amagunira aronona cane isi ndimwa co kimwe n’ibibuni. Ivyo rero ni bimwe tugerageza guha ubuzima bushasha kugira dukingire ibidukikije.”
Bimeze gute ku mwigeme gukora utwiwe?
Nagaciro: ” Mbega biroroshe ku mwigeme kwikorera utwiwe?”
Esthere: ” Ntivyoroshe na gato ku mwigeme yikorere ivyiwe, hariho ama tentantions menshi, challenges zitandukanye n’ubwo challenges bazigira bose ariko ku mukobwa hoho ziriyongera. Ariko kandi harimwo n’ama opportunités(amahirwe) ku mukobwa akora utwiwe, harimwo côté négatif na positif(inkurikizi mbi na nziza) kuko akenshi urashigikirwa kubera uri umukobwa hari abagushigikira, hakaba n’abaca bashaka kugu profita(ukuvyaza inyungu ivyo bagufashishije)”
Indoto itesa
Indoto ijugumiza umutima wa Esthere, imwe nawe nyene ayiyumviriye aca amerereza, ni uko ishirahamwe ryiwe ryoba iryambere muri Afrika Nzima, rikaba nk’icitegererezo mu mashirahamwe akora ibisharizo hamwe no gushariza bibereye ijisho muri Afrika mu buryo bufasha no gukingira isi ingaruka z’ihindagurika ry’ibihe.
Ishirahamwe Burundi Cozy Corner riritaho no gukorana n’abagendana ubumuga canke abatagira ic’epfo na ruguru ico Esthere yise “Les communautés vulnérables”
Mbega bakorera he?
Burundi Cozy Coner ikorera mu gisagara ca Bujumbura muri Kigobe Sud, avenue des États-Unis inomero 76 muri Bureau A6. Ku bashaka ubu buryo bwo gushariza amazu batiriwe bariyunguruza, Burundi Cozy Corner irabashikanira ivyo bipfuza imuhira iwabo ku mafaranga makeya cane nk’uko Esthere yabitumenyesheje.
Twarabajije kandi Esthere nimba bahora bashika mu mihana y’abantu gushariza, aratubwira ko ahubwo ari navyo bakora aho bashika mu mazu y’abantu, amabiro ndetse n’amahoteri gushariza.
Aha urabona n’uwutari umumenyeshamakuru ntiyari kugenda atabajije uyu mwigeme w’umurundikazi niba ata bibazo bahura navyo iyo bagiye gushariza aya mazu y’abantu, ico yatwishuye yimwenyurira ati:
” Nta bibazo dukunze guhura navyo tugiye mu mihana y’abantu, kubera kenshi tuvugana n’aba mama aba mama nabo nta bibazo bodutera, kandi tugenda turi umurwi, ariko nyene ntawokwijajara.”
Ugushima
Mu guheza, Esthere Munezero yasavye ko yoshimira abantu bakunda ibikorwa vyabo, abasaba ko bobandanya babashigikira kandi bishobotse babarangire n’abandi baguzi mu gihe boba babona ibikorwa bakora bibashimisha.
Mu gihe twagira duheze kuyaga, uyu mwigeme yaduhaye ubutumwa bwo gushimira urubuga Nagaciro kandi adutegeka ko tubwandika. Ubutumwa bwiwe yabushikirije buvanze n’izindi ndimi, bukaba bwagira buti:
” Ndashimiye cane Nagaciro Magazine, cane gose vy’imvamutima kubwitange, les encouragements, umutima mwiza wabo, kandi ucandike ko nshimiye vy’imvamutima Nagaciro Magazine specialement the founder of Nagaciro Magazine aragahezagirwa cane.”
