Kuri uyu wa 30 Ruheshi mw’ishirahamwe Akanyaburunga bafashanije na Gisabo Tours baratunganije ihiganwa ry’ivyese biri mu rurimi rw’ikirundi ihiganwa ryari ryitabiriwe n’urwaruka rukiri ruto.
Kuri uyu wa mbere Akanyaburunga, ishirahamwe ryishinze guteza imbere ururimi rw’ikirundi hamwe n’imico n’akaranga rifatanije n’ishirahamwe Gisabo Tours rikorera mu gisata c’ingenzi, ryaratunganije ihiganwa ry’ivyese mu rurimi rw’ikirundi ihiganwa ryise SHIRUKA AMAZINDA aho urwaruka rusanzwe rwandika ivyese ruri hagati y’imyaka 18 na 21 rwaronkejwe akaryo ko gushira ahabona impano rufise.
Iri higanwa ryabereye aho ishirahamwe Gisabo Tours risanzwe rikorera mu Kigobe, rikaba ryari rihagarikiwe n’abajejwe guhubura(gukosora) basanzwe barabunyoye muvyo kwandika ivyese n’ibikino eka mbere no kubivuga.
Abigeme na bo barerekanye ko bashoboye mu karanga k’uburundi
Uwa mbere yabaye umwigeme akiri muto, ISHIMWE Keina Ciella aho yaronse agashimwe k’ibahasha ririmwo akanoti yongera aronswa n’igitabu, igicapo c’ikarata y’uburundi eka mbere akaba yararonse n’uruhusha rwo kuzotembera mu turere tumwe tumwe tw’Uburundi ku buntu muri rumwe mu ngendo Gisabo Tours igirana n’ingenzi.
Uwa kabiri Nduwayezu Clairia yaronkejwe ibahasha hamwe n’igitabu kizomufasha muvyereke akaranga k’Uburundi.
Ahishakiye Fiston Noël nawe yabaye uwa Kane aho yaronkejwe nawe ibahasha hamwe n’igitabu kizomufasha muvyereke akaranga k’Uburundi.
Mu kibanza ca kane haza Rukundo Elie yaronse igitabo kirimwo ivy’akaranga k’uburundi.
Ryabaye ihiganwa aya mashirahamwe atunganije ku ncuro ya mbere, ihiganwa biboneka ko riza ryungura ikintu kinini mu rwaruka rw’Uburundi, aho rikwegakwegera urwaruka ubwa mbere gukunda ururimi rw’ikirundi, hakaba n’uko urwaruka ruheza rukiyumva mu karanga k’uburundi.
Rivardo Niyonizigiye yari ahagarariye iri higanwa avuga ko iri higanwa rizoza riraba ku mwaka ku mwaka canke mbere rikaba na kabiri ku mwaka mu gihe vyoborohereza ibikorwa.
