“Abatwara uyu musi ntibaje ngaho bavuge ngo nibo bakunda igihugu kurusha abandi, nta muntu n’umwe akunda igihugu kurusha uwundi” Gabriel Rufyiri
Gabriel Rufyiri arongoye ishirahamwe ryishinze kurwanya ibiturire no gusesagura amatungo ya Reta, #OLUCOME yabivuze mu kiganiro yahaye abanditsi n’abamenyeshamakuru kuri uyu wa 4 Nzero 2026, aho yavuze ati: “Abatwara uyu musi ntibaje ngaho bavuge ngo nibo bakunda igihugu kurusha abandi, nta muntu n’umwe akunda igihugu kurusha uwundi” Gabriel Rufyiri.
Mu gihe igenekerezo rya 05 Ruhuhuma uko umwaka utashe Uburundi buhimbaza ubumwe bw’abarundi, Gabriel Rufyiri yibutsa abatwara igihugu ko abantu bose baba bipfuza ko igihugu kigira amahoro. Nayo gutsimbataza ubumwe ngo bikaba ari igikorwa c’abategetsi. Aha aributsa kandi ko abanyagihugu bato bato bo atangorane bafise, ariko ko ababatera ingorane ari abanyeporitike.
“Ubumwe ntibushoboka ahantu abantu bafise umwina.” Gabriel Rufyiri atanga akarorero k’abagenda n’amaguru mu kibanza bategekanirijwe ariko abagenda n’imodoka bakabasangayo babagonga. Yibutsa ko ubumwe bushoboka mugihe umuntu yishira mu kibanza c’uwundi.
Kubijanye n’indero, Gabriel #Rufyiri avuga ko igihugu gifise ingorane yo kudaha ikibanza umuntu yagiye mw’ishure n’aho ngo abatize bafasha. Muri Reta zunze ubumwe za Amerika ngo hariho abantu biyigisha “autodidactes” kandi barahabwa ikibanza ariko ngo bivanye n’ibikorwa baba bamaze gukora.
