Syndrome d’auto-brasserie/auto-brewery syndrome ni ingwara ituma haba ivumbuka ry’urugero rw’inzoga mu mubiri wa muntu. Iyi ndwara ifata umuntu mu kaborerwe kadasanzwe kandi atigeze asoma n’akama kamwe k’inzoga. Ubundi nk’uko tubizi, umubiri usanzwe ukenera inzoga (alcool) maze ugaheza ukayihingura mu bifungurwa dufungura. Iyi ndwara rero ituma umubiri uhingura umwambiro mwinshi urenze urugero maze umuntu akaca aborerwa atasomye.
None iyi ngwara hari abamaze kuyirwara kw’isi?
Ni vyo vyashikiye Ray Lewis umubirigi w’imyaka 40 aherutse kwezwa n’ubutangane aho yariko yagirizwa kugendesha imodoka yaborewe. Amaze guhakana ivyo yagirizwa, abaganga bahavuye bamupima bamusangana iyi ndwara y’amayobera.
Ubwambere bimubako yagize isanganya igihe yariko aranyonga imodoka, aza gutora ubwenge yamaze gushika mu bitaro, kandi atari yigeze asoma. Aho hari mu mwaka wa 2014.
None iyi ndwara iterwa n’iki? Nk’uko ikinyamakuru BBC kivyandika, indwara iterwa n’udukoko twa bagiteri(bacteries) tuba mu rura rukuru tugafatira mu kanwa no mu dusaho tw’umukoyo. Utu dukoko rero dufata indya z’ifu zirimwo amidon canke isukari tukayambira igacika nk’inzoga.
Iki kikaba arico twita ukwenga inzoga kubera imbere mu mubiri (production endogène). Imwe mu migera itera iyi ndwara ikaba yitwa fungus saccharomyces.
Ibi rero biraheza bigatuma umurwayi yerekana ibimenyetso vy’imborerwa, atangura avuga amajambo, akagenda arandika umunani atananyoye na duke kandi akagira intege nke. Iyi ndwara rero yatanguye kuboneka mu mwaka wa 1940 mu gihugu c’Ubuganda.
Iyi ndwara n’ubwo idacagura abayirwara, abashobora kubangamirwa cane ni abasanzwe bagwaye indwara nk’igisukari, ubuvyibuhe burenze urugero n’ubushe bwo mu rura.
