Kimwe mu bitungwa vyari vyubashwe cane mu Burundi bw’aho hambere yari inka. Ugutunga inka ni ukuzihebera. Umurundi niwe yayamaze ngo ‘uwushaka inka aryama nkazo’. Kuva kera na rindi inka yamye ifise ikibanza kidasanzwe mu mibereho y’abantu. Inka cari ikimenyetso kitabeshwa c’ubutunzi n’icubahiro. Uwufise inka nyishi uwo yaba atunze. Inka, ibibondo n’imirima nico abantu bose bahurumbira kuba bafise.
Turaja kurabira hamwe bimwe mu bikorwa vyakorerwa inka imisi yose, tutirengagije ko inka zamye ziri mu mico y’abarundi, zamye zubashwe gushika aho zatanga urugero rw’ubwiza n’ingereranyo nzima mu barondo, abahungu n’abandi….
Ivyakorwa kuva mugatondo.
Mu gitabu ciwe yanditse citwa Imigenzo y’ikirundi, Yohani batista yandika ko nyenezo yahengera mu gitôndo akazisuzuma umuvyuko, akugurura imihôngero, akarondera ibicaniro vyumyé n’amashami y-ibiti bibisi vy’umuryango wabigenewe nk-umwokora, umuravumba na manayeze.
Ivyo bibisi rero babiremeka ivyumye kugira baremeshe igicaniro ntikirurumbe ngo gihwame n’ingoga, kandi ayo mashami niyo yafasha kwokera isazi zigahunga zikoya kurya inka.
Haca hakwirikira iki ?
Amaze kuremesha igicaniro araheza agatora inka imwé, agafata inkuyo yakozwe mu misurusuru agatangura kuyagaza ayikuyakuya, akayishitura ayikuyakuya umubiri wose cane cane ku mirundi ngo inonoke ntigotwe mu kugenda kubera ivyondo vyayifashe. Maze zose agaheza akazihetura azikorera uko hanyuma aheje ivyo agaca atangura gukama abanje gukaraba neza.
Ukumenyereza amazina inka
Muri uyu mwanya umukamyi ariko ararangura ico gikorwa ciwe c’iteka, iyo iyi nka ivyaye ubwambere, baguma bayivumereza kugira bayimenyereze izina ryayo, kugira kandi bayinezereze ishobore kugira igishika c’inyana yaba yavyaye maze ngo ishobore kuretera inyana n’umuvyinyi.Iyo inka yavyaye igaca ipfusha nayo nyene ntivyabuza ko bayivumereza. Ntahokaja yandika ko nayo nyene bayivumereza bakayivyinira igasharwa maze ikarendegera igahemuka irese igakamwa
Uguturutsa nyezina
Inka zihaze, bahejeje gukama, umwungere yaca yugurura agakobereza, inka y’intangamarara ikazikokera imbere, ikaziyobora, umwungere nawe akiyamiriza zashika mu rwuri zikarisha zigahaga ngo hagere ku musase bakamusigaranira akabanza agacura inyana ntonto ku mutaga akazicura.
Ivyo nivyo vyakorerwa inka mu gatondo gushika ku musase, ubutaha tuzobayagira ku majambo yakoreshwa ku gitungwa c’inka hamwe n’ibindi bikorwa vyakorwa inyuma y’iki kiringo tuyazeko uyu musi.
