Ku mugoroba w’uwa gatanu w’igenekerezo rya 21 Ruhuhuma 2025 barakubise harazima n’ivumbi rirarenga ku midiho mirundi benshi tutari tuzi mu giteramo c’umuririmvyi Arthur Banshayeko.
Mbega woba wari uzi imidiho nk’ubudemera hamwe n’uwitwa Amaka?
Umuhinga mu vyese akaba n’umwe mu barundi bakurikiranira hafi ivy’akaranga k’abarundi Arthur Banshayeko yarateguye igiteramo catangaje abantu benshi hamwe n’abanyamahanga bari aho, igiteramo yasohoreyemwo urukurikirane rw’indirimbo ziri mu midiho dusanzwe tutamenyereye mu burundi.
Kuri Centre culturel Izuba mw’irohero niho igiteramo cabereye, aho cuguruwe n’abandi bahinga muvy’akaranga ndetse n’abanya vyese, uri ababikora mu rurimi kavukira(ikirundi) canke indimi mva makungu nk’igifaransa canke igishwahili.
Abantu bari aho barishimiye cane uko urutonde rwagenda rurakurikirana hamwe n’akaryo kahawe n’abandi batari bake kugira berekane impano zabo.
Ibintu vyagiye guhindura isura igihe umuririmvyi Arthur Banshayeko batazira “Arthur Ban” yashika ahakirurutse bita kuri scene mu rurimi rw’igifaransa canke kuri stage murw’icongereza. aza yazikenyeye mu ndirimbo ya mbere yafashanije n’umwe mu mirwi y’abaririmbiramana b’abakirisu katolika basanzwe baririmba mu congereza.
Umudiho wa Reagge urashusha cane n’umudiho w’Amaka nk’uko indirimbo za Arthur zabitweretse.
Abari aho tukiriko turakoma induru kubera umunezero Arthur Ban yariko aradukubitamwo, twagiye twumva aduhindurira mu ndirimbo zimeze nk’umudiho wa Reagge umudiho umenyerewe kw’isi nzima.
Indirimbo yise “Sindara” ntabimubwiye yo yatumye isinzi ry’abari ngaho bumva bohaguruka bagatamba, nawe uyu muririmvyi akaba azi no gucangamura abantu aho yahavuye anabahagurutsa baratamba ivumbi ngiryo.
Ku musozo w’igiteramo abantu batari bake bari barindiriye ko Arthur Ban abasigurira ivy’uyu mudiho wa reggae narirya asanzwe afise n’ubusage, ivyaca biha igicapo mu mutwe abatari bake, ko ari muri wa muryango w’abo bita aba rasta. Twese twaratangaye atubwiye ko umudiho yaririmvyemwo atari reggae ahubwo ari umudiho w’ikirundi bita “Amaka” kandi uririmbwa henshi mu gihugu c’uburundi.
Nayo ku ndirimbo yaririmvye zagenda zoroheje, Arthur Ban yabwiye abari aho ko izo ziririmbwe mu mudiho bita “Ubudemera”
Mu kinyamakuru Nagaciro twahavuye twiyumvira kumwegera kugira tumubaze ivyerekeye imidiho yaririmvyemwo, Arthur Ban akaba yatwishuye ati:
” Ubudēmēra ni umudiho wamuka mu Kumoso na Buyogoma, ugenda bukebuke ugafasha gusohora ivyiyumviro birímwo icúrantîmba canke Imvugo nkóramútima (Lamentations, regrets, language effectif….)”
” Amaká ni umudiho wamuka mu Mugamba na Kirimiro, ukagaragara kenshi mw’ibárankuru, mu kugaragaza akanyamuneza.”
